☆النداهة☆
ندهت عليا ف يوم وعينيها بتمني
وكأنه ليلة سهر والقلب مستني
والشمس ويا القمر على فرحي بيغني
تاهت عيون القلب ويا الندا جاني
وتقولي يلا قوام ده العمر دا فاني
افرح معايا وحس املا الشعور تاني
هيساوي عمرنا ايه بيمر ف ثواني
فتعالا يوم نكتبه وامسحلي احزاني
سطر وقول غنوتك في بحر حرماني
انته يدوب مركبي على شطي وداني
وافرح ف بحر الهوا يا ابو قلب وحداني
اقفل بيبان غربتي وافرشلي بستاني
ما انته تيجان الفرح رجعالي من تاني
☆☆☆☆
بابحث على دا الصوت
ما الاقيها حواليا
وانده يرد سكوت
والصمت طال بيا
هوه احنا كنا ف حلم ؟
وللا ف امنية؟!!
مين اللي قال ده الكلام
الاقيني وحديا
يا اللي انتي صوتك ونس
داوي الجراح فيا
داوي قلوب الحيارى
من كتر لهفتهم
ف الحب عشنا سكارى
ياما دوقنا لفحتهم
والنار ف شوقنا أمارة
ف البرد لسعتهم
لا تدفي قلب الحيارى
ولا تجني فرحتهم
فياريت تجيني زيارة
وتطفي لوعتهم
☆☆☆☆
وتعود بصوتها تناجي
وتقول كلام الفلاسفة
ياحبيبي جالك ماجاني
والشوق دي مشاعره ناسفة
وكتير حنانك حواني
عن الهجر يا حبيبي اسفة
والسعد لما نداني
انا كنت عن الحب عازفة
لكن حنانك غواني
لا عرفت لعلاجي وصفة
☆☆☆☆
اتاري الكلام بين ضلوعي
وحبيبتي ساكنة وجوعي
وان قلت اهرب رجوعي
يسبق خطاويا دايما
وان قلت عنك حكاوي
وانساكي انا قلبي ناوي
القى الطبيب المداوي
يوصف هواكي مسكن
ويقولي حبك مهيمن
ساكن ضلوعي.. ويمكن
واعيش ولا عمري أشفى
2017/8/1
إرسال تعليق