رحيل
------
بتغيبي عني ماتوعدي
وبتبعدي وبتبعدي
قدري بإنك تبعدي
مهما بعدتي قريّبة
ياحنييّنة ياطيّبة
لكن غيابك هزني
محتاجة صدر يضمني
محتاجة قلب يودّني
محتاجة للي يعزني
قالوا : الطبيب ؟
قلتي : الطبيب !!
دنا رايحة البي للحبيب
كرّمني من وسط الحجيج
هوّه الحكيم هوّه المجيب
وبنور جلاله شدّني
الحزن ليه والاكتئاب
ولاّ البكا ولبس الهباب
والإنكسار ليه والعذاب
دنا داخلة من أحسنها باب
وكتير ملايكة تزفني
هيّه يادوبك زحزحة
شفت الملايكة بأجنحة
تضوي وحاجة مُفرحة
ع السدرة ساجدة مسبّحة
وادي الصراط
وعليه مشيت ومرحرحة
والجنّةمنةّ م الإله
روايحها هالّة مفحفحة
يادي الهنا .. يادي النعيم
للي ف حياته مستقيم
واللي كمان قلبه رحيم
لو قابل الوجه الكريم
ح يقول دا ربي حبني
دي الدنيا لو فيها الجمال
ولاّ صحاب ولاّ عيال
ماتسوي لحظة للهني
لحظة شفاعة المصطفي
ورضا الإله اللي اصطفي
وانوار تلالي ماتنطفي
وارواح حبايبي تودّني
وادي الفواكه كل لون
وانهار بتجري والعيون
وفيها كل ماتشتهون
واكواب شمال واكواب يمين
واطفال رقيقة مخلدين
إيه عندكم ح يهمني ؟
وادي الأرائك ناعمين
وبالحراير مفروشين
وكمان وسايد مرصوصين
وادي الأساور ملبوسين
دهب ونورنا عالجبين
وشباب وكنا معجّزين
وكمان ملايكة وحور وعين
دي الدنيا كات بتذلّني
يادي الجمال .. يادي السرور
بساتين جميلة والزهور
تسعد عيون تشرح صدور
وكل شيء بيشع نور
ولا فيش مرض بيهدّني
أما السراير في العلي
بياقوت زبرجد منجلي
ترتاح وبالك ده خلي
وتشوف نبي وتشوف ولي
وتقول دا ربي عزّني
دي الجنة دي للموعودين
المتقين الزاهدين
الطايعين الذاكرين
الحامدين الشاكرين
يكرمهم المولي الغني
اللبس فيها من حرير
وسلام مابين الناس كتير
لا حر نار ولا زمهرير
ولا صوت بيعلي يرجّني
أنا في انتظاركم بعد حين
تبقوا معايا يامخلصين
وتكونوا فيها خالدين
بادعي أنا ربي المعين
وياريته يوم ما يردني
سامية سليمان
من ديواني { رسايل للحبايب }
إرسال تعليق