الحل بسيط
**************
حاصل ضربنا ف الخلاط
كاس أوجاع والباقي عياط
م اللي ما حاول يجمع بينا
وسلم جيلنا ....... للإ حباط
م اللي ماخلي الشمس تشوف
دمعة حزن....... ف قلب ألوف
م اللي صلبنا....... واللي نهبنا
واللي رمانا .........بالميلوتوف
حاصل طرح ساعات الفرح
من أنهار ......وسنين الجرح
نظره حزينه ف عين مسكينه
فوق أنقاض...وحطام الصرح
آه من قسمه مالهاش لازمه
طول م الناتج ....عامل أزمه
آه م العود الفاسد لما
يفسد باقي عيدان الحزمه
لو عوزين الحل بسيط
من غير ثوره أو تنطيت
ازرعوا خير الخير تلقوه
طارح فرح ف قلب الغيط
ازرعوا جوه النفس ضمير
واملوا القلب بحب الخير
ربوا الطفل علي الإخلاص
تلقوا الناس ف سلام بتطير
خلوا ما بينا العدل ميزان
واملوا الكفه المايله أمان
واللي يخالف شرع الله
يبقي ده خاين مش انسان
أوعي تفكر اني عبيط
ومنيش فاهم ف التخطيط
علشان نعلي بمصر لفوق
يلزم فكر.. وعقل حويط
**********************"
رضا أبو الغيط
إرسال تعليق