(حاجات حلوة))
---------------------
أنا إنسان تكويني حنين ومشاعر وإحساس
حاجات حلوة وقلب بدق زي قلب كل الناس
مش غلطان لما حبيتك ولا مجنون
دا حقي الشرعي إني أحب وعيش في الكون
جنوني اني حبيتك وإنتِ مش ليّا
حلمت إنك بحكم ربي ليا
أصدق نفسي وعيش الحلم
وأصحو ألقاكِ مش فيّا
وامشي معاكِ مشواري بميّة مشوار
أحبك وإنتِ تختاري وأنا بانهار
تحبيني طب ازاي وقلبك ع الحبال منشور
وبيهفهف ومتشعلق ومتعلق بقلب بعيد
كتبت في حبك كااااااااام منشور
ساعات موجوع ساعات بدموع دا لو في العيد
تقولي الفرح مش موجود أقلك أيوه بالتأكيد
وأكون موجوع واستنى رنتك ليّا تداويني
دوايا عندكِ إنتِ بالتحديد
واتردد أرن أقلك وحشتيني
تحسي الدمعة محتارة هنا في عيني
بتنزل حيّة على خدي تموت فيكِ
وتنشف لما تشوف الدنيا عشان ليكِ
وقبل ماتنشف هتحكيلك علّي أنا فيه
أنا نفسي أموت واحكيه
ساعات بحلم تكوني مراتي
ونتخانق ونتشاكل وترمي حاجاتي
وزعّق لما صوتي يروح
بنظرة واحدة في عيونك دا كله يروح
م انت حنيني وفرح ايامي وروح الروح
ونتصالح ويبقلنا ولد صالح
وارجع من برا اتسحب على التسريحة
تلاقي لفة تشوفيها إزازة ريحة
لحد الليل ما ليل -----
تشميها جميلة ومريحة
تتوهي وتفرحي بيها
وتيجي تترمي في حضني في ساعة وداد
وفجأة درما بيبكي الواد
أنا أتنهد واتشنج اب اب اب أبو الواد
يعدي الليل طويل جداً كأنه حداد
عشان بايته زعلانه وشايلة عناد
أصالحك وحشني البحر وأنا معاكِ بحسه روح
بيخدك مني واحس الفرحة في عيونك تعالي نروح
ولا يهمك هنصرف إيه دي فرخة واعمليها بنية
بلاش تلبسي ضيق عيون الناس بتدبحني
بجد مش عاوز اتخانق ولا إنتِ تقولي روحني
أنا عاوزك ملاك طاير وأنا العاشق. في العيون حاير
تكوني جنبي باستمرار وأنا جنبك أتوه واحتار
هو إنتِ بجد مش ليّا واللي أنا قلته دا كله هزار
دموعي اتكلمت عني وقالت كل اللي جوايا
ولو دمعة ولو دمعة ضاعت مني أكيد وراها ألف حكاية
راح احكيها لكل الناس يمكن يوصلك إحساس
يخليكِ تشطبي نهاية وتكتبي حرف في بداية.
لأني بجد حبيتك وحقي الشرعي إني أحب
حاجات حلوة كتير فيك اكيد تتحب
..................
إرسال تعليق