كل ما نسأل ليه على حاجة
وقبل ما نعلن مُعترضين
يلهوا عقولنا ف مليون حاجة
لجل ما نصبح مش فاكرين
ننسى الحاجة وبعدها حاجة
ويصبح واقع مُر الحاجة
امتى يحسونا بنى آدمين
احنا ف مصر وربنا عارف
وعشان كده انا والله حزين
احنا ف مصر وجرحى النازف
خلا رمال الصحرا دى طين
من غير ليه يا سعادة الباشا
احنا غلابة ومش لاقيين
احنا ارانب وسط ديابة
وسط حيتان مالهاش ولا دين
احنا ف غابة ولا ف بحر
ولا دى ارض ومش فاهمين
من غير ليه يا سعادة الباشا
نفسنا نبقى حقيقى عارفين
احنا ف مصر حقيقى بجد
أُمال ليه مااحناش عايشين
الف سؤال وسؤال وسؤال
بعد الصبر عليك رايحين
رُد يا باشا على واحد فيهم
السؤالات دى بقالها سنين
احنا ف مصر حقيقى بجد
احنا ولادها . امتى وفين ؟!
شوفنا الذل ودوقنا عذاب
عايشين فيها كما الاغراب
صِبرنا كتير والصبر اهو داب
ومش كارهينها ولا بنلومها
احنا بنسأل ع الاسباب
واحنا فداها مهما يكون
وان يوم هونا .. علينا ما تهون
احنا بنصبر لجل خاطرها
ولجل خاطرها لابد نقول
احنا يا مصر ولادك مهما
الظلم حاصرنا عرض وطول
ولجل عيونك لازم برضه
حبال الصبر الدايبة تطول
....
محمود علي أحمد
إرسال تعليق