الطنبور
الطنبور
ياما كان شغال
نسقي ونزرع
على كام موال
نجري ونحصد
نشد ونقلع
ولا يوم ندفع
ونقول دا بكام
عيشة هنية
وموتة سوية
جوه الطين
برة الطين
بعيش لياليا
حصيرة وقلة
مع طبلية
هاتي الأكل
هنا يا وليه
حاضر يا عينيه
سمع وطاعة
من غير خوف
ولا حتى نطاعة
فين لولاد
جايين في السكة
طب هاتي الدكة
وهاتي كمان
براد الشاي
وقولي لعم
حسين انا جاي
شوفتوا ازاي
عيشتنا بسيطة
لا فيها شوكة 
🍴
🍴
ولا سكينة
ولا فيها لحظة
حزينة
الطنبور
بقى مكسور
بعد مكان
قلبنا مجبور
لكن دلوقتي
في مكنة
ليها كام زور
بتطلع دخنه
وياريتها تدور
وجالنا مهندس
يرسم ويخطط
وعلينا يتنطط
ويعيش الدور
أيوه يافندي
طلبك مش عندي
أنا راجل فلاح
م الفجرية
أجري على أرضي
دي بتبقى استفتاح
أعزق أشق
وبعدين ادق
بسن الفاس
وبمحراتي
ده هو حياتي
أبدر ارش
تطلع زرعة
تشوفها جميلة
بكام وش
درة وخضار
وفاكهة جميلة
عال العال
لا فيها دوا
ولا حتى مبيد
لكن دلوقتي
بعد ما كانت
يوم حصدتنا
ده يوم العيد
بقت دلوقتي
يومها بعيد
صوبة وطوبة
وياريت مطلوبة
كلها أمراض
م الباب للباب
بص يا بيه
تعرف ليه
زرعتنا زمان
كانوا بيحكوا
ويقولوا عليها
كام موال
علشان كان
عندينا ضمير
نصبر على زرعتنا
تميل
بالخير لينا
ولولادنا
حتى لأحفادنا
علشان سايبنها
على الديان
عارفين
أول ما بنزرع
مسيرها تبان
شايفين يا
عيال
لكن دلوقتي
أرضنا بور
بعد ما كسروا
الطنبور
وخايف يجي
علينا الدور
ولا يوم نلقى
زارعة جميلة
لكن أملي في ربي
كبير
مصر أصيلة
وأراضيها
جميلة
كل ما تديها
تديك
حافظ على نيلها
وراعيها
لاحسن تقسى
يافندي عليك
بكرة هاتبقى مصر
جميلة بيا وبيك
شعر/وحيدعلي محمدحسين
إرسال تعليق