بحبك يا ريما
وديما بشوفك بدون متشوفينى
وفيه خط مايل ما بينك وبينى
بعدى لعينيكي بقلبي اللى ملك
وكفر سنين الغرام يوم ما مالك
وكان عمرى مايل ويوم ما اتعدلك
كسرتى استقامة هوايا العنيد
مفيش فيا مركب يحن لقلوعك
ولا قلبي دمع فى لحظة رجوعك
مفيش نبض يلعن خلافة وريد
تموت الغلابه اللى شالت فى همك
لتحيا الغيلان اللى مصت فى دمك
ونهتف لقصرك بعمرا مديد
لا انا كنت خاين ولا كنت فاجر
ومين جوه ارضك هيقدر يتاجر
بحلم الغلابه ودم الشهيد
يا كسرانى رغم اتزان حرف جرك
مبقدرش اشوفك فى لحظة عمايا
وعشقانى لكن حنينك فى سرك
وبيرك بيبلع جميع الخفايا
بحبك يا ريما برغم انى كاره
جميع اللى صلوا ف جنازتك ورايا
مفيش ثغره بانت فى ركن الجريمه
كلامنا ف سياستك كغيبه ونميمه
وربك بيغفر جميع الخطايا
وديما بشوفك رهان ع اللى حاصل
فتصبح نهايتك بالف احتمال
فيمكن تخبى الرغيف م الاكابر
عشان يستقر ف بطون العيال
ويمكن تجيبى الملام ع اللى صابر
ويمكن عنادك شوية دلال
ويمكن كرهتى اللى دبل عينيكى
وكتف ضلوعك بالف احتلال
بنتمنى لحظة خشوع وقت فرضك
ويمكن ناذن ما نلحق نقيم
ويمكن نعيد التاريخ جوه ارضك
فنبقى الهدايه ف رحاب ابن مريم
وتبقى العصايه ف ايدين الكليم
انا لسه بحلم بثورة ضمير
ترجع لعمرك شقاوة صباه
ورحله ف ملامحك بدون خط سير
تعدل مسارك فى كل اتجاه
نداكى استخبى ف جليدك بايدك
وزرعك بيحلم بلحظة لقاه
انا ثورى لكن بموت غصب عنى
عشان تستمرى ف طريق الحياه
إرسال تعليق