يوم ماسافرت
كان ف جيوبي قرشين فرط
يوم ما اخترت
أداوي عيوبي .....واعبر شط
بعد ما بعت
البقره الغاليه....وحبة..... بط
لجل ماكمل........ تمن الرحله
وامسح كل........ أثار الوحله
واعمل فنط
أصل زهقت
من مسمار الفقر السا كن
جوه الدار
من أوتار الحزن الداكن
ليل ونهار
من دي الآهه اللي ما بتخف
من دمعيتي اللي ما بتجف
جوه عيوني اللي بتسكنها
ست الدار
يومها وقفت
ويا العقل اللي ما كان عمره
ف ليله احتار
يومها وقفت
قدام قوضة أمي الغاليه
المحتاجه الشيل والحط
قدام أبني اللي ماليش غيره
قدام مرتي ونن عيونها
اللي ما شوفتش زيها قط
يومها عرفت
اني الغربه تمنها كبير
وان مرارها بيملا البير
لما بتفقد خلق كتير
كنت بتسكن نن عينيهم
خلق زرعهم ...ومربيهم
خلق شايلهم نن عينيك
تحت رموشك بتدفيهم
وقت البرد ...............
ف زمن القحط............
يومها قرفت
بس عرفت
ان ما بيني وبينهم شط
قمت ركبت البحر وجيت
لجل ما أقابل أهل البيت
وان حبيت اتغرب تاني
أو يفصلنا... ثواني الشط
قولوا عليا بقيت مجنون
وان العقل العاقل... شط
**************************
رضا أبو الغيط
إرسال تعليق