جرب مره .....
@@@@@@@@
جرب مر ه تحس بغيرك
لف ودوّر ع الغلبان
حاول مره تشوفه بعينك
من غير شفقه أو إحسان
يمكن مره ف لحظه يشيلك
لما تكون محتاج لحنان
دنيا وعمله زي الساقيه
ديره تلف علي الانسان
ترفع واحد فوق النخله
ومره تحطه علي البركان
ونتوه منها ف وسط الزحمه
ونروح تاني لكنا وكان
واللي يسلم ليها يشوف
يفرح مره ويوم يتهان
ايوه يا عم ادي حال الدنيا
دنيا وقامت ع البهتان
فيها اللي بيتمني الرحمه
وفيها قلوب محتاجه حنان
لمسة إيدك تمنح بسمه
ممكن تحيي حياة إنسان
ايوه انا نفسي تحس بغيرك
لما تشوف إنسان تعبان
ليه تستني الطفل يجيلك
رُحله ببدله أو فستان
خليه يعرف إنك فكره
وإن الدنيا فيها أمان
وإنك عايش كل مشاكله
جرب مره تكون إنسان
جرب تمسح دمعه حزينه
تطفي النار لو كت بركان
جرب تاخد إيد مسكين
عايز ياكل من دكان
جرب تزرع بزره بإيدك
تصبح شجره ف البستان
ايوه انا نفسي تحس بغيرك
لما تشوف إنسان تعبان
حوالين بيتك ناس مساكين
عاشوا الهم مع الحرمان
والمساكين مش بس ف بلدك
بص ف سوريا أو لبنان
كل بلاد الدنيا تشوفهم
حتي اروبا وباكستان
كل شعور ف القلب يهزك
لما تشوف إنسان تعبان
حتي إن كان علي غير المله
هو اخوك من أي مكان
ايوه انا نفسي تحس بغيرك
جرب مره تكون إنسان
جرب مره تبص لجارك
يمكن غايب أو عيان
لما تزوره وتسأل عنه
تلقي النور علي وجه يبان
تلقي الناس بترحب بيك
تفرح لما تلاقي حنان
جرب تسعد كل حبايبك
قلبك يعمر بالإيمان
تلقي موده وتلقي سعاده
تلقي كرامه من الرحمن
@@@@@@@@@
بقلمي ////// طه إبراهيم
إرسال تعليق